Maggie & Patrick... Our Precious Memories

2009年9月12日星期六

生日澳門遊 (Day 2 - 24/8/2009)

09:00 都唔捨得起身，明明係星期一，但可以放假喎~ 哈!! 真好~

去左酒店附近既葉熾記，唔係貪近架，我地專登去搵佢既，因為聽聞豬扒包好好食啊~ 豬扒包又黎喇... 去澳門嘛... (食評：http://www.openrice.com/restaurant/commentdetail.htm?commentid=2028431)

除左豬扒包，必食既當然唔少得葡撻啦! 瑪嘉烈始終係名店，$7@ 唔算平一樣好多人排隊，又真係幾好食既!! 返到酒店食仲係脆皮呀~ 絕對唔似 KFC!!

去威尼斯人行左個圈，地方真係好大，周圍見到 DFS 既廣告，好親切啊~ 哈哈!!

我地入左賭場玩角子機，一路以為係要唱銀仔，原來只係入張 $20 就玩得! 超唔明係點解唔收葡幣?!! 一定要入港幣 $20!! 贏左 $60 就想走人，老公話玩多陣，結果就輸返晒... -___-"

check-out 後我地去左漁人碼頭，重點想去睇麥兜，行呀行，拎住超重既手信，行極都唔到真係想放棄，原來係行到盡頭先到!! 望到個門口更失望，超細既場，比 $35 入去一望已經望到出口，得幾隻大公仔，全部係菠蘿油王子果時 d 宣傳品!!!!!

18:00 搭船走 lu，上船前買左個豬扒包外賣比媽咪食，超細個要 $17!! 碼頭真係最晒搵笨既地方，不過無計啦~~

生日澳門遊 (Day 1 - 23/8/2009)

老公今年 30 歲生日，我決定請佢去澳門玩 2日啊~~

買左英皇娛樂酒店既 package，$1399 包1晚酒店、2人來回船飛、dinner buffet、博物館通行證、甜品劵、紅酒... 幾抵~

一早去到信德，上英皇貴賓會拎晒來回船飛，跟住去吉野家食早餐，食完行去碼頭，已有好多人排隊，好耐無去澳門，唔記得係要排隊劃位~ 我地都唔算遲，所以仍劃得窗口好位，good~

我地搭 Turbojet，架船好新好舒服，望住個海心情愉快~ 本來想趁時間瞓下，點知後面個細路由上船嘈到落船，激死人...

步出碼頭已經見到英皇既人，帶我地去搭 shuttle bus，路程好短，轉眼就到~ 新八佰伴搬左過黎英皇隔離，非常方便! 12:30pm 都無得 check-in，叫我地 2:00pm先返黎，於是就出發搵美食~~

第一站行返去議事亭一帶，星期日好熱鬧呢! 跟住旅遊書介紹，去左西環安記食豬扒包，真係幾好味，可以睇我既 openrice 食評：http://www.openrice.com/restaurant/commentdetail.htm?commentid=2027532

食完豬扒包再去食鳳城珠記魚皮角，間舖唔算好細，不過超迫，好大壓迫感，D 伙計係咁叫人入黎，即係話叫你好快 D 走!! 水餃 & 魚皮角各點一碗，餡料新鮮，水餃較好味!

食到飽行返酒店，今次有得 check-in 喇~ 間房好靚，都幾大~

下晝本想去威尼斯人，但我實在好頭痛，結果決定改於附近周圍行下，然後又去大三巴、博物館，買左好多好多手信!!

見到潘榮記想買減蛋餅，個阿姐好串，佢頭都唔擰過黎淨係開口話「賣晒!」，我明可能係有人訂晒，都唔駛咁既態度下話，巴閉!!

夜晚返英皇食 2nd round buffet，有 live band，感覺不錯! 唔算係好多選擇，但 d 野幾好食，最緊要係 free of charge~ =P (食評：http://www.openrice.com/restaurant/commentdetail.htm?commentid=2027533)

2009年9月10日星期四

Birthday Dinner @松屋

好豐富啊~~ 鍾意食放題，乜野都可以食少少...

食少少已經好飽好飽...

雞軟骨 & 鹽燒雞翼最好味!!

多謝老公... 祝我生日快樂! =)

2009年8月16日星期日

麥兜响噹噹

入場時老公一支箭衝入去，比人搣晒飛，比我發現咁得意既牌，賴死影埋張相先，個職員無理我係無飛入場... 哈~

預左有 D 悶位，結果覺得好正，今次個故事寫得流暢 D，仲好感人!

咁細個要去武當學武，唔捨得媽媽係咁喊，真係我都想喊~

呢個小朋友、呢個媽媽，睇落覺得佢地好可憐，但佢地自己又活得好開心喎~

每個麥兜故事都包含好多小道理，小朋友可能係哈哈哈就出返黎，大人睇完會有好多反思... 相信都係佢成功既其中一個原因~

2009年8月14日星期五

Starbucks 加 $1 多 1杯

睇報紙發現渣打卡做緊幾個加 $1 既 promotion，仲要係 Starbucks、Hagadazs 呢 d 喎~

同 ah man 去健威食完元氣再飲 Starbucks，呢個 lunch 真係好開心...

2009年8月2日星期日

會唔會燒壞腦...

39.2、38.4、40.1、39.8、38.7... 好耐未試過咁發燒，會唔會燒壞腦...

星期五放工去公司對面間診所睇醫生，佢都話我無發燒既，不過開左一隻「防發燒」藥比我。

夜晚食左 2 次藥係收左鼻水，但個人好唔舒服就早 D 去瞓，是晚唔開冷氣開風扇，老公熱到死，我無咩感覺...

星期六唔駛返工，8 點幾醒左好頭暈，起身探熱先知燒成咁，探左好多次都係 39 度以上，再食多次藥 & 自己加多一粒退燒藥，沖多次涼諗住降溫，10點幾再瞓返，呢次都係開風扇，越瞓越打冷震，卷實張被.... 4 點老公返到黎再探多次 39.5，一 D 好既跡象都無....

即刻落去再睇多一次醫生，帶埋北角醫生包藥比佢睇，招醫生問左好多野，以為佢會捉我去醫院...

返屋企又瞓，醒左食粥再食藥再瞓，今朝起身已經無發燒，但喉嚨又痛返，比早2日仲痛...