新春 9 天假：年初五 ~ Domon 拉麵

講左去好多次去 Domon，今日終於得閒去喇~

Lunch set 有小食 & 拉麵

魚生：老公話好新鮮，好好味，一碟有 4 片好滿足~

咖哩飯：我好鍾意食日式咖哩，呢個幾香呢~

泡菜拉麵：叉燒煮得好好味呀! 好軟腍，好入味，正!

拉麵幾粗身，香蛋味，夠彈牙，唔錯唔錯~

湯底味道適中，食完唔會口渴，估佢無 or 好少味精 =)

辛辣拉麵：我諗辛辣係講緊 d 肉碎，不過食落只係少少辣，略欠香味

配汽水就似乎係最唔合襯既地方 lu，我都係覺得綠茶好 d!

新春 9 天假：年初四 ~ 好味元氣 tea set + 攪笑牛丸事件

年初四大家開工囉.... 我放假呢!! (呵呵..... 風涼中....)

今日同老公 & 媽媽去荃灣，一心諗住食勁辣米線，點知食閉門羹，人家同我一齊年初八先開工!!

去左香港仔魚蛋粉食早餐 (已經 12 點)，落單個阿姐真係攪笑~

老公：唔該我要個牛腩魚蛋河丫
阿姐：唔.... 牛丸魚蛋牛腩...
老公：唔係，我係要牛腩拼魚蛋河
阿姐：牛丸魚蛋牛腩... 咁樣加法要 30 蚊喎! 係咪要牛丸魚蛋呀?
老公：我唔係要牛丸喎，我要牛腩拼魚蛋河
阿姐：哦... 牛丸牛腩...... (一路寫單)
老公：係牛腩，同埋魚蛋，兩樣野，要河粉...

我同媽媽忍唔住笑，媽媽問我呢個係咪麥兜.... XD
人地從來都無話要牛丸，都唔明點解阿姐係都要講牛丸.... 哈哈哈哈!!

之後去行荃新天地 & 荃灣廣場，d 商場都仲係好多人買野，唔知咁既情況仲會 keep 到幾耐呢? 希望過左 CNY 經濟唔會突然插水啦...

行過元氣有 tea set，係 weekdays 先有架!! 難得機會梗係要食!!

$39 個 set，有 4-6 件壽司 & 2 款小食，好抵呢~

唯一失望既係有選擇 = 無選擇... 蟹子沙律、沙追魚 & 炸雞 3 揀1 架嘛，order 時佢話沙追魚 & 炸雞都賣晒... 想食烏冬又係無既!!

新春 9 天假：年初三

去左幾日街，今日終於可以 stay 向屋企休息下...

落街行完一個圈，準備今晚既晚餐，話食開年飯，其實都係個食多 d 既藉口嘛.... 嘻!!

阿立黎左拜年，一齊打麻雀~~

立聽日出發又去韓國... 係又去呀，不過今次唔係公司做野，佢約左十幾個朋友一齊去，真犀利~ 比佢講講下，攪到我都想改變主意去韓國 (正計劃 3月去台灣嘛...)，記得上次狂買 skin care，全部都好抵... 幾時可以再去呢?!

新春 9 天假：年初一、二

年初一同媽媽拜年，第一封利是!!

諗住氹佢封利是比我 d 豬仔，佢比左一封佢覺得最得意果隻就打發我走 la，哈哈哈哈~~ 佢話我成大堆豬，一隻派十蚊都唔掂... 哈哈哈哈~~

下晝去老爺奶奶度拜年，食左好多野呢~~ 呢個新年分分鐘又肥多幾磅!!!

年初二出去同老爺果邊 d 親戚，約埋德福稻香飲茶，又係食... 4 點先食完 lunch，夜晚又去奶奶果邊 d 親戚既團拜，酒樓 again!! 真係食唔落....

祝大家 牛年大吉、身體健康!!

新春 9 天假：年三十

老公屋企年年既年三十晚都係 BBQ 團年既，今年我 join 第 3 年喇~~

去左 3 年，我都係唔知果度係邊，附近好似係三聖 =P

奶奶準備左好豐富既食物，今日天氣又好喎，心情真好!!

新春 9 天假：年廿九

第一日放假，感覺真好~

9 日假呀.... 結婚之後都無試過放咁長假，正!!

今日上最後一堂 Excel VBA，呢個 course 都係一般，教得好慢... 上完幾堂，最記得都係 ah sir 成日「射叻機」!! 講足咁多堂已經唔好笑 lu~ 不過人家本來就唔係諗住講笑既，只係最初聽果時真係一頭霧水，睇埋 notes 先知佢講 「select case」姐... 哈哈!!!

夜晚返屋企團年，六姨都過左黎，我地齊齊食燒烤 + 打邊爐，好玩呢!!! 六姨好欣賞我個芋絲糕，於是成盒送左比佢喇!!! =)

又一賀年美食 ~ 蘿蔔糕

年廿八返半日咋，朝早一返工就開會，連開 2 個會出黎已夠鐘去食團年飯，因為請左年初四五放假，要交代埋 D 工作，真係好鬼趕....

成班 OFC 同事去食 CWBNS 食團年飯，祺哥擺明蝕住做我地呢餐，全部大件夾抵食呢!!

可能太多公司都係放半日，鵝頸橋個巴士好多人呀，早知行前一個站 la... 上車好迫，仲要拎住一盒年糕、一盒流沙包、一個玻璃花樽.... 救命~

返屋企整我既賀年第 2 炮 ~~ 蘿蔔糕!!

媽媽準備左好多材料，2 斤幾蘿蔔，配料有 4 條臘腸、12 粒中size 瑤柱、半碗蝦米... 總之係好多，同個蘿蔔既份量唔相稱... 哈~

整左兩底，送左一底比奶奶 =)

利是

食完 lunch，向公司樓下再買多左 2 包麥嘜麥兜利是封，好得意啊...

簡直唔捨得封比人 =)

又到封利是既時候喇!! (好似講到封左好多次，只係第 2 次咋!)

計返上年封左百幾封，點解會咁多既?!

上年因為結婚前唱左好多新銀紙，過年就唔駛煩。

今年發現剩餘既新銀紙得廿幾張，早前諗住返公司問 A/C，點知佢地自己唱晒，無問其他部門 D 人駛唔駛唱，仲好似講到我地應該唔駛唱咁，真係得啖笑 -__-"

早兩日同 Esther 出去食飯，行過渣打見無乜人排隊 (因為唱新銀紙限左 9-11am)，諗住唱「迎新」銀紙，點知埋到去問佢「可唔可以比 d 新淨 d...」，個哥哥仔就拎左成疊全新既銀紙比我地!! 嘩哈哈!!!!!!!!!! 我地即刻乘機再拎多左 $ 出黎唱... 嘻!!

雖然「全新」同「迎新」都係錢，但一心諗住唔會有既野，突然得到真係好開心呀~~

自創美味臘味芋絲糕

~~ 臘味芋絲糕 ~~

芋頭 2 斤半
蝦米 半碗
臘肉 半條
紅蔥頭 5 粒
粘米粉 10 湯匙
生粉 7 湯匙

調味：
水 6 湯匙
糖 1 湯匙
鹽 2 湯匙
雞粉 1 茶匙
五香粉 1 茶匙
麻油、胡椒粉 少許






做法：

(1) 臘肉和紅蔥頭砌成細粒，與蝦米落鑊爆香
(2) 芋頭刨皮後清洗抹乾，砌成絲
(3) 芋頭絲、粘米粉、生粉與調味料一同拌勻，直至所有芋頭絲沾上粉漿
(4) 將材料倒入已塗油的糕盤內，稍為壓實
(5) 放入滾水大火蒸 30 分鐘
(6) 放涼後砌件煎香即成

新年快樂、步步高陞~!!!

moc moc 又 lee 埋向梳化底喇...

佢自己攝入去，仲可以 u-turn 轉返個頭出黎... 勁~

唔知入面係咪好舒服呢? 好似好享受咁樣~~

不過佢姨丈一有行動，佢就會攝攝攝返自己出黎... =)

moc moc 食北海道帶子

超級為食既 moc bb...
大過1蚊銀既北海道帶子，好食都唔停得口! Yummy!!

老虎咁大隻狗

放工行去轉旺角小巴時，見到呢狗，老公專登走埋去比我影~

好大隻，但好乖架，見陌生人都無乜反應... =)

元旦：振興經濟日

高官落區購物，我地以行動支持!! (賴人~~)

今日去葵芳，出力振興經濟... =P

MAXFACTOR 買 $200 送化妝袋 + 影線筆 sample + Lip Gloss
好抵呀! 我已經買左 2 sets 喇~~


Body Shop 買 $500 送 $100
d 野正價都唔係話咁抵... 無 coupon 應該唔會買喇~

Blue Corn mask 好好用架，好乾淨~ 已經無用幾年 =)
Vit. E cream 係老公既，我未用過，準備去偷用... 嘻!!
另外仲買左 Honey hair conditioner & Vit. E eye cream