Maggie & Patrick... Our Precious Memories: 04/01/2009

2009年4月28日星期二

榴槤

星期六突然想食榴槤，同老公落去生果檔睇，金枕頭 $10/磅都唔平，老細幫我地揀左個 $85，好貴... 不過想食就算啦!

滿心歡喜... (相信大家已估到唔係好結局)

返屋企打開黎睇，咁鬼少肉既?! 8.5 磅既榴槤先得 3 舊肉?! 其他零零碎碎就好多，似乎佢好似未熟...

最慘都唔係少，係無味!!! 無味既程度係食落索索聲，水一樣清淡!!!

好鬼嬲.... 個老細一定心諗有 2 個傻仔幫襯左佢買個劣品!!

---------------------------------------------------------------------

星期一放工我地去左惠康買野，見到榴槤 29.9/個，當然 size 細好多~ 諗返起星期六咁唔開心，於是今次自己出手揀!! 查實我地 2 個都唔識，只係聽阿媽講過少少方法，心諗 30 蚊姐，買錯左都無咁心痛!!

返到屋企，阿媽話唔夠熟，聞一聞又好似真係乜味都無喎!! 好彩未開可以放下先，於是就將佢放o係窗台曬太陽~~ 曬左 1日之後，今晚老公就手起刀落!

嘩~~~~ 好甜呀~~~ 好腍添!!

當然老實講佢既香味同真正既金枕頭仍有一段距離，不過邊個叫我地買左個劣質既金枕頭呢?!? 相比黎講，今晚呢個真係太太太太好味喇~~~

2009年4月25日星期六

想點、應該點、可以點

今日收到阿冰既電話，佢最終都決定離開。

training team 近日不斷計劃緊改變，心裡好大壓力...

公司未好明確提出乜野要求，不過事實上一向都唔需要人地比壓力我，自己比自己既壓力已經夠有突... 不斷問返自己想點、應該點、可以點...

阿冰既離開，係轉變中再轉變... 知道後即刻打電話比 man & winnie，兩個唔同既回應，一路啟發我諗之後既路，縱然呢一刻仍未清晰，我都係 +ve 既!!

台北之旅

終於完成 4 日遊記，歡迎收睇~~

可以去 facebook 睇其他相：
http://www.facebook.com/album.php?aid=74846&id=573946093&l=4685a786d8

2009年4月21日星期二

1st Qtr

諗返報 2009 Planning，原來已經係半年之前既事喇~

日子真係過得快，開心咁過，唔開心又咁過...

今日就去 DM 報第一季總結，一次過數返 1st Qtr 既工作，我地既日子真係好充實!!

所有人都集中在 HRIS，被問起半年前已經答左既問題，我知道唔明既人好可能係一路都唔會明，不過當 IT 同事話要買乜 hardware、software，我地唔識就選擇唔 comment，相信佢既專業吧!!

2nd Qtr 繼續加油!!

冷氣開鑼~

春天同冬天交錯過後，話咁快夏天就到!!

冷氣終於o係尋晚正式開鑼~~ 好清爽!!

呢晚訓得特別舒服~~ =)

2009年4月11日星期六

家家親台北之旅 - DAY 4

** DAY 4： 25/3/2009 (WED) ***

行程：酒店早餐 -> 溫泉博物館 -> 靈芝專賣店 -> 貔貅館 -> 蒙古燒烤 -> 茶藝館 -> 西門町 -> 機場 -> 返屋企喇!!

-----------------------------------------

今早執齊行李就出發 lu~ 話咁快就 Day 4~

第一站係 Day 2 過門無得入既溫泉博物館，匆匆入去匆匆出返黎，已經唔記得有咩特別~

博物館對面有棵櫻花樹，媽媽執左一粒趺左落黎既櫻花，等我同雨褸豬影左沙龍~

靈芝 xx 館，除左靈芝，仲有 d 鹿胎賣，真係好核突!!! (無影相!!)

牆上仲有隻扁晒既鹿...

Lunch 去左食蒙古燒烤，我記得睇食尚玩家見過街邊食呢個燒烤~

其實係好玩多過好食! 好玩因為可以自己夾鍾意既材料比師傅幫你烤!

食完飯去左呢間茶藝館，呢個姐姐好攪笑! 完全無 hardsell，仲同我地玩問答遊戲，我地都有兩全份獎品呢~ 嘻!!

因為 4 點幾先出機場，剩餘既時間就放低我地o係西門町，

日光之下既西門町人影都唔多隻，好無氣氛呢~

老公明明好飽，都堅持食返碗阿宗麵線，至今我都係唔明點解好食...

5 點幾就去到機場，好多人，領隊都辦手續都攪左好耐，佢一行返黎就同我地講：全部都係單丁位!! 好彩只係個幾鐘，食完野睇陣電視都返到，所以都 ok!

去程 32 kg，回程 55 kg

我以為會 double 架! 所以都唔算好多丫!!

同老公調左，所以有個窗口位坐

台灣回程係咪一定食鳳梨酥既呢?

總結呢 4 日行程都玩得好開心~

今次係我地第一次同老爺奶奶媽媽去旅行，其實佢地三老比我地更開心!!

希望下一次再約埋多 d 人一齊去，包團!!

家家親台北之旅 - DAY 3

** DAY 3： 24/3/2009 (TUE) ***

行程：酒店早餐 -> 信義誠品 -> 101大樓 -> 台北車站地下街 -> 良品牛肉麵 -> 福州胡椒餅 -> 光南大批發

-----------------------------------------

是日全日自由活動，出發前都有諗過今日去邊好，不過已預計老爺奶奶媽媽唔會想行咁多，所以都係一邊行一邊計劃~~

紅樹林站搭出去台北市中心要成 45 mins，我地第一站係市政府。

去誠品書店，各自逛左 1 個鐘，我買左兩本手工書，都係手信~

我一向都幾鍾意去歷史博物館，今次黎到又同佢地去多一次~

101 大樓呢個行程真係絕不可少，雖然重點都只係同 101 影張相!!

估唔到咁早就投降，媽媽好快已經話腳痛，於是我地就返去台北車站食野喇~

必食推介!! 良品牛肉麵~~ d 麵好闊，好有質感!

再過去對面馬路食胡椒餅!! 新鮮出爐!!

之後就去左江南大批發掃貨，呢間野真係乜都有，最緊要係 d 野真係好抵呢!!!

是日戰利品一覽...

夜晚去左酒店附近一間中式餐廳食飯，無帶相機，不過其實麻麻地姐~ 唔值得介紹~~ d 印度咖哩苦既... 失望!!

家家親台北之旅 - DAY 2

** DAY 2： 23/3/2009 (MON) ***

行程：酒店早餐 -> 溫泉博物館 -> 珍珠養殖中心 -> 中正紀念堂 -> 點水樓午餐 -> 九份 -> 漁人碼頭 -> 淡水老街

-----------------------------------------

07:00 起身食早餐，D 野都幾好食，最鍾意係炒新竹米粉

出發去溫泉博物館.... 門口...
因為人家逢星期一休息，我地齊嘩嘩黎到先知喎!! (連自遊行都唔應該會發生既事....)

唯有門口郵筒拍照留念，到此一遊....

第二站去中正紀念堂，坦白講我對歷史無乜研究亦無乜興趣....

影相留念~

LUNCH 去點水樓食小籠包，好豐富呢!!

好均真的安排：每人 4 個正宗小籠包、1個蟹粉、1個烏龍茶、1隻餃、1件燒賣、1碟菜.... 加加埋埋真係好飽!! 味道亦好好~

食完上返車又眼瞓... 長肉中....

醒一醒已到九份 lu~ 車外望出去既景

旅遊書介紹既魚丸伯仔，麻麻地姐~

長州都有既薯塔，NT$40

好咸既台灣香腸，真係... 唔覺得好食!

返酒店 check-in 再出漁人碼頭，呢 2 晚都係住同一間，唔駛再搬~

到達漁人碼頭時，已經日落完喇~

可能因為係星期一，成條淡水老街好靜，19:30 左右已經相繼關門 lu~

花枝丸 NT $15/3粒，好抵食!

好味既淡水魚丸，仲有包包 (個餡其實係一樣既!!)

晚餐去食牛肉麵，無乜選擇之下求其入左一間，唔好食，唔值得介紹~

2009年4月10日星期五

家家親台北之旅 - DAY 1

** DAY 1 ： 22/3/2009 (SUN) ***

行程：
香港機場 -> 台北機場 -> 忠烈祠 -> 台式料理 -> 美麗華百樂園 -> 酒店 -> 士林夜市

-----------------------------------------

一朝早 05:00 就起身出發囉~~ 有得去玩真開心!

05:45 準時落到樓下搭的士，之前問過的士台報價 $180，又話其實同跳錶短加長減出黎個數係差不多，唔緊要啦由得佢跳錶，結果係 $17X，老公都係俾足 $180~ 哈!

06:15 去到機場集合，兩親家見面囉~ 組合晒我地呢個 5 人小組，其實我地已經佔左成個團四分一，全團 19 個貴客咁大把~ 大約一半係後生仔世界，一半係家庭組合，呢次係我第一次跟新華，領隊 Dicky 圓碌碌，幾好人，希望成個旅程開開心心!

係咪 CX 早機都一定係食 Cest' Bon 腿蛋包?