健康院 - 第一次檢查

出院打電話去健康院，約到今日去檢查，

爸爸今日放假，可以一齊去，真好呢!!

因為子宮仲收縮緊，個肚仲係漲漲，

行路有點唔舒服，要慢慢行，

抱住6磅幾既魚魚，真係有少少吃力~~

健康院填好資料後，要幫bb除衫除片磅重，

出院時 2.83kg，今日 2.885kg，追得咁快?

一個不留神，魚魚係我地未包得切片既時候 weewee，

件衫同包被都濕左了!!

我地也驚覺唔記得要帶定衫出街替換，一睇就知我地係新手啊!!

結果只可以用大量紙巾盡量印乾... XD

之後入登記房，問左好多好多資料，姑娘填左成大疊表格，

再等見醫生，呢個醫生好 cool 呢，唔太溫柔地幫魚魚做 body check，

黃疸大約 169，只知道係合格，但無講詳情...

轉頭又入返姑娘房，教埋身餵奶，魚魚喊晒口，

一係啜兩下就瞓左，姑娘話佢可能已習慣啜奶咀，

叫我如想全埋身就要忍心由佢喊幾日...

其實我地覺得泵奶無問題，最緊要俾到最好營養佢嘛。

最後排期，一次見醫生，一次 regular check，

我唔想爸爸豬成日請假，唔知一個人攪唔攪得掂呢?

恭喜發財！新年快樂！

初乳

第一次泵，用spectra m1好順利，
開最細已經痛痛地，
泵得好慢，各20分鐘先得20ml，
滴滴珍貴，哈哈哈！

努力！

魚魚的第4天 - 我們回家了

媽媽同魚魚狀態大好，4日可以順利出院了！

魚魚趕住出世，張醫生緊急開刀，
加收左20%，我地預6萬，
埋單總數$47xxx真係驚喜！
最緊要當然係魚魚健康同平安！

返屋企第一次換片、第一次泵奶，
樣樣都好新鮮，要慢慢學習，
三個大人對住一個小朋友，
無比挑戰！

好不容易先泵到20ml初乳，
兩邊各20分鐘，但算不錯了，
魚魚飲完終於肯乖乖瞓一陣……

魚魚的第3天 - 第一次餵奶奶

今日精神好多，無晒喉可以自由活動，

唔需要姐姐幫手抹身，

食完早餐，就報名餵魚魚~~

第一次抱魚魚，有點手足無措，軟乃乃，

好怕用錯力，又唔識點餵，好在姑娘好 helpful，

主動埋黎教我點抱、點埋身，

當然，其實根本無奶，只係試下位，

魚魚好醒目，啜左幾下知道無奶就唔啜，

之後就試餵奶樽，佢食得好快呢，

食左 70ml，後來姑娘先話原來佢食 45-60ml 已差不多，哈!!

除左餵奶，今日仲參加左2個講座，時間過得好充實，

第一個講座爸爸豬一齊去，講照顧初生bb，同產後營養，

都幾好，重溫下之前參加講座學既知識，仲有小禮物送。

下晝另一個係出院講座，只可以俾媽媽參加，

講解出院手續，然後教bb沖涼。

辛苦晒爸爸豬陪伴，大家都好興奮執野，

期待明天接魚魚返屋企了!!

魚魚的第2天 - 第一次看清楚您

呢幾日辛苦爸爸豬同婆婆豬頻撲，

全日黎照顧同陪伴，

住私院呢方面真係好好，

0730至2200好長探訪時間，

公院就只得每晚2個鐘。

一朝早起身爸爸豬就來了，

張醫生10點幾巡房，第一句就話我精神好好，

同尋日比相差好遠，哈哈！

佢話我情況唔錯，即刻問佢係咪4日可出院，

佢話無發燒既話應該可以，好開心。

等到差不多12點，終於有姑娘同我拆尿喉，

戴埋束腹帶，可以試落床了！

落床呢下一定要有人扶，坐起身同落地會扯到傷口，

子宮位覺得好墜，個肚亦好漲，簡直好似未生咁，

扶住慢慢行，1300即刻去排隊睇魚魚，

第一次望清楚個女，呢刻真係好感動，

佢仲第一次張開雙眼望住我地呢！

睇相同望真人好唔同，

覺得佢好細粒，成個公仔咁，

只係一日前後，由肚裡面郁郁下，

到瞓左係我前面床仔，太神奇了！

睇完魚魚覺得好肚餓，同爸爸上canteen食意粉，

轉頭太麻麻同大姑婆黎睇魚魚，好多人錫魚魚。

全日好多段睇bb時間，我地每一節都無錯過，

呢個小可愛真係百看不厭，嘻嘻…

You are the LOVE of OUR life

You are the love of my life, I knew it right from the start,
The moment I looked at you, you found a place in my heart.

Babi & Mami Love YOU Forever!

魚魚的第1天 - 小可愛出來了！

本來約定1月29嘛，

點知魚魚原來想返屋企過新年，

提早1月26日年廿六出來了！

26號凌晨4點幾5點，突然感到一陣暖流，

即刻扎醒，落床衝入廁所，

已見好多水，仲有粉紅色，

爸爸豬急call張醫生，張醫生吩咐唔好飲水食野，

我地即時執野，5點半搭的士入醫院。

去到醫院其實唔覺好多羊水流出，

不過開始有d不規則宮縮，

登記都幾多野填同簽名，

本想住3人房，點知姑娘話25號好多人入院，

3人房full晒，安排全部香港媽媽既6人房比我。

另外要揀補奶粉，基本上所有大牌子都齊晒，

illuma都有，我地揀左能恩。

之後姑娘帶左我入間房仔檢查，

驗小便，仲了左啲羊水，然後剃毛。

之後轉另一張床駁機check bb心跳，

期間有人黎抽血，幫我換手術袍，

被通知已安排8點做手術，好緊張啊！

由0620一直駁機check到0755，

轉張碌碌床準備出發，

飲左細細支胃藥，甜到震！

被推出去，終於見返爸爸豬，

由於我要緊急開刀，醫院唔俾陪產，

唯有鼓起勇氣，孤身作戰吧！

爸爸豬只能陪我行左幾步，

姑娘就叫佢在waiting room等待bb，

而我就被推落2樓手術室了！

落到手術室，對一輪資料，

就見到張醫生同麻醉醫生，

基於信任，見到張醫生個心定左，

佢亦好輕鬆甘同我講笑，緩和緊張氣氛

……

麻醉醫生在右手種豆，好痛呢，好彩一take攪掂，

跟住要側身屈到自己變蝦米，

背脊打麻醉藥，呢針只係小小痛，

一陣就覺得下半身痹晒了！

知道插尿喉，但無感覺，哈哈。

拉左塊布之後，我已經見唔到張醫生，

但2個醫生繼續同我傾計，

佢地話5點穿水已經好好，

如果2點就可能有排等先有得開刀，

又話魚魚計晒數要返屋企過年，好乖……

一路傾計之下，完全唔知張醫生幾時落左刀，

麻醉醫生在我果邊推左個肚幾下，

未夠8點半張醫生就拉左魚魚出來了！

第一眼望魚魚，好細粒呀！

魚魚放大喉嚨喊，超大聲啊，哈哈哈！

姑娘抱走左魚魚抹身，轉頭抱返過黎我面旁，

好近望到魚魚，好污糟豬，但好可愛！

麻醉醫生揸機幫我地影相，

好快又抱走左魚魚，帶去見爸爸豬了！

然後手術繼續，張醫生都好快手幫我縫傷口，

提醒3個鐘後先會散晒麻醉藥，

到時會食止痛藥，又會塞藥，

吊鹽水亦有止痛成份，

跟住佢幫我打左d藥，唔知係乜，

後來講返係對付我拆晒既喉嚨，

第2日我終於開返聲。

離開手術室，大約9點，在休息室停留左約10分鐘，

好快就推上房，呢刻先第一次埋自己床，

見到爸爸豬已幫我擺好啲野，

姑娘入黎已俾到手術室影相隻CD我，好快。

轉頭爸爸豬亦食完早餐返黎喇。

雖然唔可以落床，但精神狀態都ok，

只係仍然拆聲，根本講唔到野

……

1300 睇bb時間，魚魚可以被觀看了，

爺爺麻麻婆婆姨媽小強伯伯嬸嬸個個去睇，

我都好想睇啊，只可以睇相

……

沖乾淨涼，魚魚個樣好似唔同晒，

睡得甜甜，好可愛呢~~

醫院送左相冊比我地，

原來佢地幫魚魚影證件相，

塊面好圓啊，成個波咁呢！

個樣又唔同左喎。

滿心期待第2日落床，可以親眼睇魚魚。

麥兜利是封

早排玩左個晴報攪既 fb game，
被揀中得獎，有一套5包利是封，
好靚呀！

其中一款係立體，成張賀卡甘！

帶妹豬睇豬豬

早前玩晴報遊戲得獎，
今日專登去左荃新天地領獎，
有5疊豬豬利是封，呵呵！

產前講座 - kinetics

37w2d 聽埋呢個講座收工！

Kinetics 出名難抽，估唔到甘好彩，
定係佢會揀d後期媽媽?

個 talk 直落2個鐘但無悶場，
內容ok豐富但欠組織，好似隨口講甘。

早前 fb join 左打針團購，
聽埋個 talk 先去交錢，
$4450 k2 plan 妹妹豬可以打少6支針，
唔駛甘痛、減少發燒機會！

恩語 BB

葉恩語

~ 來自上帝的恩典和祝福

~ 凡事謝恩、感恩、惜福

~ 懂得講恩言美語、造就人的說話

英文譯音 Yip Yan Yu = YYY

爽歪歪....?! (真係慘，第一個花名係 babi mami 諗的)

哈哈哈哈~!!

改名真係好難，諗用乜字、組合出來意思、讀音，

又貪得意數下筆劃，總係覺得改左之後先會諗到更好，

幾個月以來已經諗過好多個了!!

本來好喜歡「信希」，有信念和希望，

但掙扎在比較中性(似男仔)，亦太多人用「希」或同音...

想過用「芊妤」，寫出來讀出來都好女仔，也優雅，

但意思上好似較簡單，欠特別(事事有餘...)

仲有「思妤」、「家妤」、「珈妤」等等...

BB 豬仲有8日就出世喇~~

無論改邊個名，我地希望比到您最大祝福，錫晒您!!

張智產檢 - 36w5d

哈哈哈，妹妹豬好乖呀，
竟然俾我地睇到甘清楚個樣，
塊面豬好大好得意呢！
好似babi豬！

今日有 5lb13oz，兩星期多左 10oz，

醫生話進度都 ok，預計出世都有 6lb幾，

頭仔同肚仔都細左幾日(35w幾)，
但腳仔有38w長！(好明顯係似 babi 啦~)

醫生話24/1去QE check完心跳正常，攞埋 b鏈報告，
我地就可以直接入院見喇……

魚魚收禮物

多謝 babi豬運豬署同事！

永遠的好伙伴

曾經跟你們一起奮鬥，一切不會忘記，

希望將來有機會再做同事... =)

9個月了！

轉眼9個月了！
仲有14日就可以同妹妹豬見面，
準備左好多野，又覺得好多未攪掂咁呀，
無用陪月，希望一切順利！

呢個月個人特別疲累，
腰好累好軟，行快兩步都唔得，
瞓覺轉身周身痛，
唔轉又硬晒呔瞓唔到，
好彩都唔算成日醒，
可以夠精神返工！

公司動盪到唔知前路係點，
3個月後返去好可能人面全非，
隨時搬埋添！
仲有最後6個working days，
都唔到我諗，唯有唔諗甘多，
返到去先算喇……

snapshot - 36w updated

15/1/2014 - 36w

足9個月喇~!!!!

還記得最初3個月真係好漫長，

數來數去都未夠 12w，

唐氏 pass 左之後又到等 20w結構，

之後開始買買買，為小豬準備一切，

期待見面，

又唔捨得佢係肚內踢踢既感覺，

真矛盾!!

14 days left~~

8/1/2014 - 35w

呢排個肚好似突然吹波咁大左好多，

後期果然特別勁!!

34w5d 見醫生 5lb 3oz，

一個月時間妹妹重左 1lb 7oz了!

希望佢健健康康，做中碼小豬~~

21 days left~~

1/1/2014 - 34w

Happy New Year!!

28 days left~~

25/12/2013 - 33w

Merry Christmas!!

聖誕呢幾日，好多1月BB趕住出黎過節，

fb group 日日都有好消息!

35 days left~~

18/12/2013 - 32w

妹妹豬足8個月了!! 叻叻!!

雖然呢排有時少少想嘔，條腰又軟軟地，

但都唔算好辛苦，妹妹乖~~

42 days left~~

11/12/2013 - 31w

尋晚突然宮縮幾次，痛左十秒左右，

好驚妹妹豬早出世啊~

妹妹豬要乖!! 我地約定年廿九見呀!!

49 days left~~

4/12/2013 - 30w

妹妹豬「3」字頭喇!!

仲有8星期就見面，好緊張呢!!

56 days left~~

27/11/2013 - 29w 

爸爸成日笑人地為食妹，

今週靚相就加熊大食野圖啦! =P

呢幾日開始凍，轉季發現無乜衫岩著添...

要入貨喇!!

(現時為止仍未買過孕婦衫~ XD)

64 days left~~

20/11/2013 - 28w 

個肚仔越來越大了!!

唔知點解影相睇好似好細，真人相差好遠呢~

今個星期剪左頭髮了(不情願地...)

妹妹豬郁動多左，早兩晚半夜唔停地游來游去，

好得意~ 捉左爸爸豬隻手過黎就乖左，

出世後會唔會都係夜晚唔瞓覺架?

70 days left~~

13/11/2013 - 27w 

呢個星期妹妹豬活躍左，郁郁都大力左，

尋晚爸爸豬伸隻耳仔埋去即刻被妹妹踢踢，

哈哈哈哈!!

26w2d見左張醫生，一切順利，2lb3oz中碼豬

77 days left~~

6/11/2013 - 26w 

第一次朝早嘔，

無野好嘔，嘔晒黃膽水，好苦!!

84 days left~~

30/10/2013 - 25w 

上星期先話重得比較少，

今周即刻嚴重超標多左 2lb~!! 

太放肆了... =.=

91 days left~~

23/10/2013 - 24w 

足6個月了!!

反左光，睇唔清楚個腩仔，

今週重左0.6lb，可以追返多少少!!

98 days left~~

16/10/2013 - 23w 

點解影相好似時大時細咁既呢?

105 days left~~

9/10/2013 - 22w 

好似突左咁多出黎既?

2/10/2013 - 21w 

唔係好突，好圓丫!!

20w... 5個月了!!

開始每星期影相留念!!

18w... 腰粗粗，但未係好覺肚突突

17w... 係肚腩嗎?

韓式拌飯

大病一場

星期五去完 QE 就開始肚痾，唔知係咪7仔鮮奶+芝腿治有問題?

晚飯都無胃口，臨瞓刷牙嘔晒晚餐碗麵出黎，

半夜胃痛醒，食左包餅再瞓又好似無乜事...

星期六呆下呆下到 1:30pm 先起身，

落大快活食 tea 又無胃口，食得少少返屋企又痾又嘔，

總之食乜嘔乜，晚飯只係雜菜湯+飯一樣無留低...

打左俾張醫生，佢話應該係腸胃炎，叫我量血壓，

如果 over 140/90就要入院，好彩只係 12x/6x...

今日起身好似精神返 D，去海皇食粥，

轉頭行完 PK shop 已經要衝住去 toilet 嘔...

即刻去仁康睇醫生，醫生都係話腸胃炎，開左3日藥。

食完呆到不見天日，但總算無再痾嘔，

輕左幾磅，希望唔好影響妹妹豬 (佢仍日日大力踢踢，乖~)

9個月都健健康康，臨尾先黎大病一場，真係金。

Combi Well Comfort 紫色戰車

買左幾個月，收貨了！

靚靚紫色，又輕身，好鍾意，
希望妹妹豬都鍾意啦！

QE 產檢 - 35w2d

今日約 10:30am，試下搭 13x，上車無位，
我已經係企在關愛座前，d 人當睇唔到，
過左幾個站，有個唔係落車既太太主動讓座，
算啦~~ 香港人就係咁~~

驗小便非常順利，一 take 過關，
真係好奇怪，點解一次 pass、一次 fail 既呢?
黃姑娘話上次種菌無發現，可以當無事。

今次除左聽心跳、度肚，仲驗埋 b鏈，
有事無事都唔會通知，直至下次見面先講，
唉丫，諗住唔再去架嘛... 24/1 又要再去，
到時一定要通知決定去私家了...

倒數3星期

最後21日咋！

好緊張啊！

大解散

外星人侵佔地球計劃越來越狠，
大殺天下...

餘下地球人只會更加想移民，
留低你隻外星怪自己同自己玩吧!!

張智產檢 - 34w5d

頭圍 BPD 8.88cm (35w6d)

肚圍 AC 29.66cm (34w5d)

大腿 FL 6.50cm (35w4d)

Weight 2348g (5lb 3oz)

Age 33w6d

Growth 29.2%

今日妹妹豬玩趴地熊，完全睇唔到面仔，好神秘!!

關於 QE 驗到尿蛋白，張醫生話佢都有幫我驗，好輕微，
佢認為好小事，無需要理~~

張醫生講解左一次手術過程，大約1小時，

估計妹妹頭仔有9.5cm，開刀約10cm，佢話復原會縮返2cm左右，

攞妹妹豬出黎其實好快，主要多時間係縫傷口，

手術後3個鐘麻醉藥未過都唔會痛，之後吊鹽水有止痛藥，

又會食藥及塞藥，第2日先會試落床~~

醫生真係好好人，雖然緊張，其實都好放心!!

獨一無二豬豬掛飾

二手大改造，變成這個獨一無二的！

裝飾、娛樂、洗腦……

妹妹豬好快會認得豬豬了！

Twisties

今早媽媽豬返工 OT，爸爸豬去沙田攞床褥，

仲買左好多 Twisties 美味米返來啊!!

懷念中學時代最愛的啡色咖哩味~~

都應該係因為大財團壟斷，俾唔起上架費而絕跡超市，

好多想當年既美食，今時今日真係唔易搵到!!

Happy New Year!! Go Go Go!!

2013年，上半年曾經經歷低潮，

然而感謝上帝在合適時間賜下妹妹豬，拉緊我地家庭關係，

下半年過得非常開心，每日都期待著跟小可愛見面!

希望我地一家以後都幸福健康快樂~~

準備左好多個月，大部分野都 Ready 了!

踏入2014，最後倒數4星期!!

元旦日，當然都係上班日，

放假前最後一次完整 payroll cycle，要交帶工作了!

下晝同爸爸豬去樂富閒逛，食左好耐無去既 euro gogo，

有好好味既蜜糖雞翼、焗薯皮!!